Zhvillimi i pozitës administrative territoriale të Luginës së Preshevës nga koha e Perandorisë Osmane (1878) e deri në ditët tona

Abstract

Ky punim shtjellon çështjen e zhvillimit të pozitës administrativeterritoriale dhe politike të Luginës së Preshevës në një hark kohor mbi një shekull, përkatësisht nga periudha e Perandorisë Osmane deri në kohërat e tanishme. Nëpërmjet një analize historike dhe krahasuese, synohet të paraqitet mënyra se si kanë ndryshuar ndarjet administrative dhe statusi politik dhe institucional i këtij rajoni, në varësi të ndryshimeve politike, gjeopolitike dhe shtetformuese që kanë ndodhur në Ballkan. Fillimisht, studimi ndalet tek pozita e Luginës në kuadër të vilajeteve osmane dhe organizimit të saj në sanxhaqe dhe nahije. Më pas shqyrtohen ndryshimet pas Kongresit të Berlinit (1878), integrimi i pavullnetshëm në Mbretërinë Serbe, transformimet gjatë periudhës së Jugosllavisë mbretërore dhe asaj socialiste, si dhe statusi aktual i komunave të Preshevës, Bujanocit dhe Medvegjës në kuadër të Republikës së Serbisë. Ky studim ofron një kontribut të rëndësishëm në kuptimin e lidhjes ndërmjet strukturave administrative, por edhe për të kuptuar mundësitë artikulimit më të qartë të kërkesave të popullsisë së kësaj anë për një status të posaçëm politik.